ఏడేళ్ల బాలికను రేప్ చేసి చంపేసిన హంతకుడికి మరణశిక్ష అమలు... బాధితురాలి తండ్రి ఎదుటే ఉరి!

ఏడేళ్ల చిన్నారిని దారుణాతి దారుణంగా అత్యాచారం చేసి, ఆపై ఆమెను హత్య చేసిన ఇమ్రాన్ అలీ అనే నిందితుడిని లాహూర్ కోర్టు ఉరి తీయించింది. బాధితురాలు జైనబ్ అన్సారీ తండ్రి ముందే అతన్ని ఉరితీయాలని కోర్టు తీర్పివ్వగా, పోలీసులు అతనికి శిక్షను అమలు జరిపారు. హత్యాచార ఘటన జనవరిలో జరుగగా, పాప మృతదేహం ఓ డంప్ యార్డులో కనిపించడంతో దేశవ్యాప్తంగా నిరసనలు వెల్లువెత్తాయి. రెండు వారాల అనంతరం నిందితుడిని కౌసర్ పోలీసులు అదుపులోకి తీసుకున్నారు.

ఆపై విచారణలో మరో ఆరుగురు అమ్మాయిలనూ అతను హత్య చేసినట్టు తేలింది. కోర్టు తీర్పు మేరకు జైనబ్ తండ్రి అమిన్ అన్సారీ కళ్లముందు అతన్ని ఉరితీశారు. ఈ ఉరిశిక్షను బహిరంగంగా అమలు చేయాలని, అందరి ముందూ ఉరి తీయాలని అమిన్ అన్సారీ చేసిన డిమాండ్ ను మాత్రం కోర్టు తోసిపుచ్చింది. శిక్ష అమలు తరువాత అతను మీడియాతో మాట్లాడుతూ, తన బిడ్డ తిరిగిరాదన్న సంగతి తనకు తెలుసునని, అయితే, న్యాయం గెలిచిందన్న సంతృప్తి మాత్రం మిగిలిందని అన్నాడు. ఈ ఉరిశిక్షను మీడియాలో చూపించాలని కోరాడు.